كلو عادي مش هيك؟

كلو عادي مش هيك؟

** إنو يجي رئيس يعمل اتفاق مع دولة، ويجي الرئيس اللي بعدو يقول "بطلت ألعب"، ويلحس الاتفاق تبع اللي قبلو... عادي

** إنو دول الخليج تبارك موقف أمريكا من إيران ـ اللي ما بحبها بالمناسبة ـ زي ما إسرائيل باركت نفس الاتفاق... برضو عادي

** وكمان عادي كتير إنو محدش يفتح سيرة النووي الإسرائيلي لأنو بيطلعلها لإسرائيل "يحق للإسرائيلي ما لا يحق لغيره"... يمكن أكثر من عادي

** عادي إنو إسرائيل تتسلبط على أموال المقاصة الفلسطينية وتتحكم في إنو وين نصرفها ولمين وقديش ووقتيش... برضو أكثر من عادي لشو الحكي.

** كمان عادي إنو البنوك ترفض تفتح حسابات لأقرباء المعتقلين ـ البنك العربي وبنت مروان البرغوثي نموذجاً ـ، ويطلب تصريح مكوث من مواطن من غزة بدو يفتح حساب... حدا قال مش عادي؟

** عادي إنو ما يطلع ولا تصريح لكتاب وناشرين غزة الـ73 اللي كان مفروض يجو على معرض الكتاب، وكمان ميطلعش ولا لكاتب عربي أي تصريح، ونظل نحكي على السيادة... هذا كثير عادي برضو.

** عادي إنو أزاريا اللي قتل عبد الفتاح الشريف يطلع من السجن على هيئة بطل، وناس محبوسة على كلمة في الفيس بوك... يا الله قديش عادي.

** عادي كتير إنو حضرتك تكتب عن سوريا وعن اليمن والعراق وتقف في وجه الظلم، وانا عمري ما قرأتلك بوست واحد عن فلسطين... يا حبيبي يا مظفر النواب "يدافع عن كل قضايا الكون ويهرب من وجه قضيته"... هذا العادي تبع العادي.

** عادي كتير إنو البلون بعد ما ينتفخ ينسى إنو مليان هوا من جوا، ويطلع على حالو في المراية ويعجب بحجمه على مرأى من دبوس هو مش منتبهلو... والله عادي.

** أما أكثر إشي عادي عن جد، هو المناظرة اللي صارت في بير زيت مبارح، وهاي اللي بتقول بوضوح، ليش كل اللي انكتب فوق عادي، وأكثر من عادي.