يا أخي، إنتو مقسومين، وكل واحد فيكو بيحكي شكل، وإسرائيل فايتة بكل خيط بكل شقفة أواعي بتلبسوها، والتنظيمات صارت زي أولاد الروضة، هذا الي لأ هذا إلي، وهات علبة الشوكلاتة اللي امي جابتلكو ياها... وبطلت ألعب...
ليش كل هالاستغراب من اللي بتعملو إسرائيل؟ إذا كنتو نفسكو مش متفقين على إنو العالم اللي بيموتو شهدا واللا مش شهدا، إذا كنتو نفسكو مش عارفين الله وين حاططكو، و فلسطين آخر همكو، وبتنطو على الحيط لحظة ما يصير إشي، زي نقل السفارة الأمريكية للقدس، وبعدين بنرجع نحكي الرابع من حزيران، وعلى فكرة السفارة الأمريكية مش في الرابع من حزيران، بس هذا هو الفرق بين حدا عارف شو بيقول، وحدا بيردد زي الببغاء، ولا عارفين شو بدنا، ولا ايش بنسوي، وفي الاخر بيقولك إسرائيل تنتهك القانون الدولي، عفواً، أي قانون دولي؟ القانون الدولي إسرائيل بتعزف عليه منيح، وبتدوزنه زي ما هي بدها... أهلين قانون دولي، وأهلين تنظيمات فلسطينية، وأهلين إعلام فلسطيني... وغطي شعرك يا بنت...
