إحنا الفلسطينية مش فاضيين للحكي الفاضي، قال تل السكن والآثار قال، احنا مشغولين بالتحرير، مشغولين بالمقاومة والنضال ضد الاحتلال، شو قاعدين تحكولي اثار ومناهج دراسية وعنف ضد المرأة وبطالة، هاي قضايا تافهة جنب قضية التحرر، مالكو يا جماعة.
في نص التسعينات رحت أنا وعبد السلام شحادة على منطقة مدرسة الزهرا في غزة، عشان عبد السلام كان بدو يصور شوية حاجات، ولقينا اشي بيقولولو قبر شمشون، يعني شمشون الجبار، وجنبو المعبد اللي هدو على حالو وعلى أعداؤه، وعارفين شو كان على قبر شمشون؟ كانت وزارة الأوقاف مخزنة كياس رز أو عدس مش متذكر بالزبط، بس كانت الاكياس مصفطة فوق القبر على أساس انو شمشون بيقدر يشيل أوزان كتيرة زي منتو عارفين، وبرضو اياميها كنا في مرحلة تحرر، وما كان بيعنينا الآثار...
شو تل السكن وما تل السكن، اهدو وروقو يا جماعة، وشو يعني تمثال ابولو اللي محدش عارف وين راح، وشو يعني الفسيفساء اللي جرفتوها عشان تعملو معسكر تدريب، كل هذا مش مهم، منا قلتلكو انو احنا في مرحلة تحرر، ولكو تحرررررررررررر، واذا حدا سألني شو يعني مرحلة تحرر، الجواب بسيط، هي انك تتحرر من كل شي، بداية من آثارك وتاريخك، والباقي يتبع...
